𑢷𑢨𑢼𑢨𑢱 𑢷𑢢𑢼𑢢𑢱𑢥𑢡𑢷𑢣

𑢩𑣚 𑣕𑣉𑣚 𑣞𑣋𑣉𑣖 𑣞𑣎𑣁𑣉 𑣞𑣂𑣊𑣋𑣈𑣜𑣈 𑣅𑣗𑣃 𑣚𑣂𑣘𑣂 𑣏𑣂𑣕𑣂 𑢹𑣗𑣁𑣜𑣊 𑣏𑣂𑣕𑣂 𑣖𑣈𑣓𑣈𑣖 𑣗𑣗𑣁 𑣗𑣂𑣕𑣂 𑣕𑣗𑣃 𑣗𑣞𑣁 𑣝𑣃𑣚𑣚 𑣙𑣃𑣔𑣁 𑣗𑣈𑣜𑣈𑣑 𑣗𑣂𑣜𑣂𑣑 𑣅𑣁𑣗𑣃 𑣓𑣂𑣔𑣈 𑣆𑣘𑣂𑣆 𑣘𑣂𑣅𑣃𑣀, 𑣞𑣂𑣜𑣖𑣁 𑣆𑣘𑣂𑣚𑣚𑣌𑣉 𑣚𑣈𑣌𑣁 𑣚𑣂𑣘𑣂-𑣚𑣂𑣘𑣂 𑣕𑣗𑣃. 𑢬𑣓𑣞𑣁𑣜𑣂 𑣖𑣞𑣃𑣜𑣂 𑣗𑣗𑣁 𑣗𑣂𑣕𑣂 𑣗𑣀𑣓𑣔𑣂 𑣚𑣈𑣌𑣁 𑣞𑣉𑣓𑣁 𑣏𑣀𑣓𑣔𑣂 𑣘𑣉𑣅𑣞𑣁 𑣒𑣌𑣁 𑣚𑣈𑣌𑣁 𑢷𑣙𑣁𑣜𑣉𑣕 𑣔𑣂𑣝𑣃𑣖 𑣜𑣓𑣂 𑣎𑣚𑣂𑣅𑣈 𑣖𑣜𑣁𑣄 𑣚𑣈𑣌𑣁 𑣓𑣂𑣕𑣂𑣜 𑣘𑣂𑣓𑣕𑣂𑣜𑣅𑣁𑣗𑣃 𑢹𑣗𑣁𑣜𑣊 𑣏𑣂𑣕𑣂 𑣞𑣂𑣊𑣋𑣂 𑣎𑣈𑣒𑣈 𑣕𑣃𑣜𑣕𑣃𑣊 𑣚𑣈𑣌𑣁 𑢮𑣉𑣕𑣉𑣓 𑣎𑣉𑣋𑣁𑣉 𑣅𑣁𑣗𑣃 𑣗𑣚𑣈𑣄 𑣞𑣂𑣒𑣂𑣅𑣈 𑣗𑣂𑣒𑣂𑣅𑣈 𑣚𑣈𑣌𑣁 𑣙𑣜𑣁 𑣖𑣜𑣁𑣀 𑣕𑣅𑣉𑣖 𑣆𑣛𑣃𑣄𑣅𑣁𑣗𑣃 𑣈𑣊𑣋𑣁-𑣁𑣘𑣃 𑣚𑣈𑣌𑣁 𑣙𑣈𑣜 𑣁𑣏𑣁𑣙 𑣜𑣉𑣁𑣅𑣁𑣗𑣃 𑣌𑣓𑣞𑣁𑣜𑣂 𑣖𑣞𑣃𑣜𑣂 𑣗𑣃𑣜𑣃 𑣔𑣜𑣃 𑣚𑣈𑣌𑣁 𑣙𑣜𑣁 𑣖𑣜𑣁𑣊 𑣔𑣜𑣃𑣅𑣁𑣓 𑣜𑣈 𑣗𑣙 𑣎𑣉𑣙𑣗𑣃 𑣓𑣖𑣈 𑣚𑣈𑣚𑣈 𑣔𑣃𑣖𑣃𑣜 𑣔𑣌𑣁 𑣚𑣈𑣌𑣁. 𑢹𑣞𑣁 𑣗𑣞𑣁 𑣚𑣂𑣘𑣂 𑣏𑣂𑣕𑣂𑣜𑣈 𑣈𑣝𑣃 𑣖𑣈𑣓𑣄 𑣞𑣋𑣁𑣆 𑣞𑣙𑣂𑣕𑣅𑣉 𑣏𑣂 𑣞𑣓𑣁𑣋𑣉𑣖 𑣙𑣜𑣕𑣁 𑣙𑣞𑣁 𑣈𑣚𑣁𑣗𑣃 𑣗𑣆 𑣈𑣚𑣁𑣗𑣃 𑣓𑣂𑣜𑣈 𑣞𑣈𑣓𑣈 𑣓𑣈𑣓 𑣙𑣉𑣜𑣁𑣕𑣈 𑣇𑣀𑣑𑣂 𑣗𑣉𑣌𑣉 𑣔𑣔𑣁 𑣔𑣆 𑣓𑣈𑣚 𑣓𑣖 𑣉𑣚 𑣘𑣛𑣁𑣉 𑣅𑣁𑣌𑣉 𑣙𑣃𑣎𑣃𑣄 𑣘𑣂𑣛𑣂 𑣙𑣉𑣓 𑣌𑣉𑣛𑣁 𑣌𑣃𑣛𑣂, 𑣋𑣃𑣊𑣋𑣃 𑣎𑣆. 𑢾𑣁𑣙𑣂𑣕𑣅𑣉 𑣏𑣂 𑣞𑣓𑣁𑣋𑣉𑣖 𑣙𑣜𑣕𑣁 𑣙𑣞𑣁 𑣕𑣗𑣃 𑣙𑣃𑣔𑣁 𑣁𑣜𑣞𑣂 𑣙𑣞𑣁 𑣗𑣞𑣁 𑣚𑣂𑣘𑣂 𑣏𑣂𑣕𑣂 𑣕𑣗𑣃 𑣕𑣂𑣞𑣂𑣀 𑣌𑣈𑣛𑣈𑣄𑣓𑣁 𑣔𑣜𑣕𑣂 𑣖𑣜 𑣈𑣚𑣁𑣗𑣃 𑣔𑣉𑣚𑣁𑣗𑣃 𑣌𑣃𑣜𑣃𑣖𑣃𑣒𑣃𑣗𑣃 𑣚𑣋𑣁𑣕𑣂𑣀 𑣎𑣉𑣔𑣂 𑣓𑣈𑣓𑣁𑣌𑣉 𑣌𑣖 𑣎𑣂𑣆𑣑 𑣎𑣉𑣋𑣁𑣉 𑣞𑣈𑣕𑣁 𑣏𑣂 𑣌𑣃𑣂𑣑 𑣚𑣈𑣌𑣁 𑣞𑣓𑣁 𑣎𑣚𑣁𑣕𑣂𑣀. 𑢶𑣃𑣏𑣈𑣑𑣉𑣄 𑣕𑣖 𑣞𑣞𑣓-𑣔𑣂𑣜𑣂 𑣔𑣈𑣝𑣁𑣆𑣚𑣂 𑣉𑣁𑣄 𑣁𑣔𑣂𑣀 𑣎𑣉𑣔𑣂 𑣌𑣖 𑣚𑣛𑣁𑣂 𑢶'𑣄 𑣈𑣌𑣕𑣂𑣅𑣁𑣜 𑣚𑣋𑣂𑣑 𑣕𑣂𑣞𑣂𑣀 𑣔𑣄 𑣔𑣉𑣜𑣈𑣅𑣁 𑣙𑣃𑣎𑣃𑣄𑣅𑣈 𑣁𑣗𑣃 𑣗𑣃𑣀𑣁𑣚𑣉𑣄𑣟 𑣎𑣕𑣂 𑣙𑣃𑣔𑣁 𑣕𑣗𑣃 𑣖𑣂𑣞𑣂𑣀 𑣈𑣓 𑣖𑣃𑣞𑣂𑣀 𑣔𑣉𑣜𑣈𑣅𑣁 𑣔𑣄𑣜𑣈 𑣗𑣃𑣀𑣁𑣚 𑣕𑣓𑣁 𑣌𑣖 𑣔𑣆𑣅𑣁𑣄 𑣕𑣃𑣞𑣂𑣀. 𑢩𑣕𑣉𑣚𑣚 : 𑢴𑣓𑣞𑣁𑣜 𑢷𑣉𑣔𑣜𑣁 𑢹𑣕𑣃 : 𑢯𑣂𑣜𑣃𑣗𑣈𑣛𑣁 ( 𑢺𑣃𑣘𑣃𑣀 𑢷𑣈𑣛𑣁 ) 𑢵𑣙𑣓𑣁 : 𑢯𑣉𑣌𑣉𑣜𑣔𑣙𑣉𑣜𑣘𑣃𑣜 ( 𑢯𑣌𑣁𑣙 ) 𑢴𑣃𑣕𑣃𑣖 : 𑢮𑣙𑣁𑣜𑣌𑣙𑣁𑣓𑣑.